Institution de la religion chrétienne

Institution de la religion chrétienne

Pource qu’en la première édition de ce livre je n’attendoye pas qu’il deust estre si bien receu comme Dieu l’a voulu par sa bonté inestimable, je m’en estoye acquitté plus légèrement, m’estudiant à briefveté: mais ayant cognu avec le temps qu’il a esté recueilly de telle faveur que je n’eusse pas osé désirer (tant s’en faut que je l’espérasse) je me suis senty d’autant plus obligé de m’acquitter mieux et plus plenement envers ceux qui recevoyent ma doctrine de si bonne affection, pource que c’eust été ingratitude à moy, de ne point satisfaire à leur désir selon que ma petitesse le portoit. Parquoy j’ay tasché d’en faire mon devoir: non-seulement quand ledit livre a esté imprimé pour la seconde fois, mais toutes fois et quantes qu’on l’a r’imprimé, il a esté aucunement augmenté et enrichy. Or combien que je n’eusse point occasion de me desplaire au travail que j’y avoye prins, toutesfois je confesse que jamais je ne me suis contenté moy-mesme, jusques à ce que je l’ay eu digéré en l’ordre que vous y verrez maintenant, lequel vous approuverez, comme j’espère. Et de faict, je puis alléguer pour bonne approbation, que je ne me suis point espargné de servir à l’Eglise de Dieu en cest endroict, le plus affectueusement qu’il m’a esté possible: en ce que l’hyver prochain, estant menacé par la fièvre quarte de partir de ce monde, d’autant plus que la maladie me pressoit, je me suis d’autant moins espargné, jusques à ce que j’eusse parfait le livre, lequel survivant après ma mort monstrast combien je désiroye satisfaire à ceux qui desjà y avoient proufité, et désiroyent d’y proufiter plus amplement. Je l’eusse bien voulu faire plustost: mais ce sera assez tost, si assez bien: et quant à moy, il me suffira qu’il ait apporté fruit à l’Eglise de Dieu, encores plus ample que par cy-devant. Voylà mon seul souhait: comme aussi de faict je seroye bien mal récompensé de mon labeur, si je ne me contentoye estre approuvé de mon Dieu, pour mespriser les folles opinions et perverses des ignorans, ou les calomnies et détractions des malins. Car combien que Dieu ait du tout attaché mon cœur à une droicte affection et pure d’augmenter son règne, et servir à l’utilité de son Eglise: que ma conscience me rende bon et certain tesmoignage devant luy et devant ses Anges, que je n’ay eu autre intention depuis qu’il m’a donné ceste charge et office d’enseigner, sinon de proufiter à son Eglise en déclairant et maintenant la pure doctrine qu’il nous a apprise: toutesfois je ne pense point qu’il y ait homme sur la terre qui soit plus assailly, mords et deschiré par fausses détractions, tant des ennemis manifestes de la vérité de Dieu, que de beaucoup de canailles qui se sont fourrez en son Eglise: tant des Moines qui ont apporté leurs frocs hors de leurs cloistres pour infecter le lieu où ils venoyent, que d’autres vileins qui ne valent pas mieux qu’eux. Sans aller plus loing, desjà ceste Epistre estoit sous la presse quand j’ay receu certaines nouvelles d’Ausbourg, où les estats de l’Empire se tenoyent, qu’il y avoit là couru un grand bruit que je m’estoye révolté à la Papauté, lequel avoit esté recueilly par les cours des Princes avec trop grande facilité: ce qui monstroit que beaucoup de meschans hypocrites faisans profession de l’Evangile, eussent bien voulu qu’ainsi fust. Voylà le bon loyer que me rendent beaucoup de courtisans, lesquels ont souvent expérimenté ma constance, et pourtant me devoyent bien servir d’advocats, si l’ingratitude ne les eust empeschez: et tant plus devoyent juger équitablement de moi, m’ayant cognu tel. Or le diable avec toute sa bande se trompe fort s’il cuide m’abatre ou descourager en me chargeant de mensonges si frivoles. Car je me confie que Dieu par sa bonté souveraine me donnera de persévérer avec patience invincible au cours de sa saincte vocation, comme j’en donne de nouveau bonnes enseignes à tous Chrestiens. Or mon but a esté de tellement préparer et instruire ceux qui se voudront adonner à l’estude de Théologie, à ce qu’ils ayent facile accès à lire l’Escriture saincte, et à proufiter et se bien advancer à l’entendre, et tenir le bon chemin et droict sans choper. Car je pense avoir tellement comprins la somme de la religion chrestienne en toutes ses parties, et l’avoir digérée en tel ordre, que celuy qui aura bien comprins la forme d’enseigner que j’ay suyvie, pourra aisément juger et se résoudre de ce qu’il doit chercher en l’Escriture, et à quel but il faut rapporter le contenu d’icelle. Et pourtant il n’est jà besoin qu’en mes Commentaires, ausquels j’expose les livres de l’Escriture saincte, j’entre en longues disputes des matières qui sont là traittées, veu que le présent livre est une addresse générale pour guider ceux qui désirent d’estre aidez: comme de faict on voit que je n’aime point d’extravaguer ny user de longue prolixité. Par ce moyen les Lecteurs seront soulagez d’ennuy et de fascherie, quand ils auront esté diligens à se munir par l’instruction de ce présent Livre, pour tenir en tout le reste un train aisé: ce que j’aime mieux qu’on cognoisse par effect, que de m’en vanter. Sur quoy je vous recommanderay à la garde de Dieu, désirant aussi de n’estre point oublié en vos sainctes prières, selon le fruit que vous recevrez de mes labeurs.

au Roy de France très chrestien, François, premier de ce nom, son prince et souverain seigneur, Jehan Calvin, paix et salut en Jésus-Christ.

Au commencement que je m’appliquay à escrire ce présent livre, je ne pensoye rien moins, Sire, que d’escrire choses qui fussent présentées à vostre Majesté: seulement mon propos estoit d’enseigner quelques rudimens, par lesquels ceux qui seroyent touchez d’aucune bonne affection de Dieu, fussent instruits à la vraye piété. Et principalement je vouloye par ce mien labeur servir à nos François: desquels j’en voyoye plusieurs avoir faim et soif de Jésus-Christ, et bien peu qui en eussent receu droicte cognoissance. Laquelle miene délibération on pourra facilement appercevoir du livre, entant que je l’ay accomodé à la plus simple forme d’enseigner qu’il m’a esté possible. Mais voyant que la fureur d’aucuns iniques s’estoit tant eslevée en vostre Royaume, qu’elle n’avoit laissé lieu aucun à toute saine doctrine, il m’a semblé estre expédient de faire servir ce présent livre, tant d’instruction à ceux que premièrement j’avoye délibéré d’enseigner, qu’aussi de confession de foy envers vous: dont vous cognoissiez quelle est la doctrine contre laquelle d’une telle rage furieusement sont enflambez ceux qui par feu et par glaive troublent aujourd’huy vostre Royaume. Car je n’auray nulle honte de confesser que j’ay yci comprins quasi une somme de ceste mesme doctrine laquelle ils estiment devoir estre punie par prison, bannissement, proscription et feu: et laquelle ils crient devoir estre deschassée hors de terre et de mer. Bien say-je de quels horribles rapports ils ont remply vos aureilles et vostre cœur, pour vous rendre nostre cause fort odieuse: mais vous avez à réputer selon vostre clémence et mansuétude, qu’il ne resteroit innocence aucune ny en dits ny en faits, s’il suffisoit d’accuser. Certainement si quelqu’un, pour esmouvoir haine à l’encontre de ceste doctrine de laquelle je me veux efforcer de vous rendre raison, vient à arguer qu’elle est desjà condamnée par un commun consentement de tous estats, qu’elle a receu en jugement plusieurs sentences contre elle, il ne dira autre chose, sinon qu’en partie elle a esté violentement abatue par la puissance et conjuration des adversaires, en partie malicieusement opprimée par leurs mensonges, tromperies, calomnies et trahisons. C’est force et violence, que cruelles sentences sont prononcées à l’encontre d’icelle devant qu’elle ait esté défendue. C’est fraude et trahison, que sans cause elle est notée de sédition et maléfice. Afin que nul ne pense que nous nous complaignons de ces choses à tort, vous-mesme nous pouvez estre tesmoin, Sire, par combien fausses calomnies elle est tous les jours diffamée envers vous: c’est asçavoir, qu’elle ne tend à autre fin, sinon que tous règnes et polices soyent ruinées, la paix soit troublée, les loix abolies, les seigneuries et possessions dissipées: brief, que toutes choses soyent renversées en confusion. Et néantmoins encores vous n’en oyez que la moindre portion. Car entre le populaire on sème contre icelle horribles rapports: lesquels s’ils estoyent véritables, à bon droict tout le monde la pourrait juger avec tous ses autheurs, digne de mille feux et mille gibets. Qui s’esmerveillera maintenant pourquoy elle est tellement haye de tout le monde, puis qu’on adjouste foy à telles et si iniques détractions? Voylà pourquoy tous les estats d’un commun accord conspirent à condamner tant nous que nostre doctrine. Ceux qui sont constituez pour en juger, estans ravis et transportez de telle affection, prononcent pour sentence, la conception qu’ils ont apportée de leur maison: et pensent très-bien estre acquittez de leur office s’ils ne jugent personne à mort, sinon ceux qui sont, ou par leur confession, ou par certain tesmoignage, convaincus. Mais de quel crime? De ceste doctrine damnée, disent-ils. Mais à quel tiltre est-elle damnée? Or c’estoit le point de la défense: non pas désadvouer icelle doctrine, mais la soustenir pour vraye. Yci est osté le congé d’ouvrir la bouche. Pourtant je ne demande point sans raison, Sire, que vous vueilliez prendre la cognoissance entière de ceste cause, laquelle jusques-yci a esté démenée confusément sans nul ordre de droict: et par un ardeur impétueux, plustost que par une modération et gravité judiciaire. Et ne pensez point que je tasche à traitter yci ma défense particulière, pour impétrer retour au pays de ma naissance; auquel combien que je porte telle affection d’humanité qu’il appartient: toutesfois comme les choses sont maintenant disposées, je ne souffre pas grand dueil d’en estre privé: mais j’entrepren la cause commune de tous les fidèles, et mesmes celle de Christ, laquelle aujourd’huy est en telle manière du tout deschirée et foullée en vostre Royaume, qu’elle semble estre désespérée. Ce qui est bien advenu par la tyrannie d’aucuns Pharisiens, plustost que de vostre vouloir. Mais comment cela se fait, il n’est point mestier de le dire yci. Quoy que ce soit, elle est grandement affligée. Car la puissance des adversaires de Dieu a obtenu jusques-là, que la vérité de Christ, combien qu’elle ne soit perdue et dissipée, toutesfois soit cachée et ensevelie comme ignominieuse: et outre, que la povrette Eglise soit ou consumée par morts cruelles, ou deschassée par bannissemens, ou tellement estonnée par menaces et terreurs, qu’elle n’ose sonner mot. Et encores ils insistent en telle rage qu’ils ont accoustumé, pour abatre la paroi qu’ils ont jà esbranlée, et parfaire la mine qu’ils ont encommencée. Ce pendant nul ne s’advance, qui s’oppose en défenses contre telles furies. Et s’il y en a aucuns qui veulent estre veus très-fort favoriser à la vérité, ils disent qu’on doit aucunement pardonner à l’imprudence et ignorance des simples gens. Car ils parlent en ceste manière, appelans la très-certaine vérité de Dieu, Imprudence et ignorance: et ceux que nostre Seigneur a tant estimez, qu’il leur a communiqué les secrets de sa sapience céleste, Gens simples: tellement tous ont honte de l’Evangile.